තුන්හෙලේ වීඩියෝව

මේ වීඩියෝව අපි කරපු අත්හදා බැලීමක් එත් සිරිස ටීවී ඇතුලු නාලිකා කීපයක් ඔස්සේ මේ වීඩියෝව විකාශනය කෙරුනා. බලන්නකො හොඳද කියල. කමෙන්ට් එකක් දාන්න. මෙහි රූගත කිරීම් කෙරුනේ 2008 වසරේ පෙබරවාරි 4 වැනිදා. මෙහි අධ්‍යක්ෂණය විදර්ශන රත්නායක මහතා ද, සංගීත නිර්මාණය බිබිලාදෙණියේ මහානාම පොඩි හාමුදුරුවෝද(කලින් පූසා වතුරට දැමූ කතාවේ පොඩි හාමුදුරුවෝ) වෙයි.

http://www.youtube.com/watch?v=Fs1xGqJ2vaI

කම්පියුරයට කසල ශෝධකයෙක්.

මම වින් හතට මාරු වුන නිසා ඒක හරියන මෘදුකාංග හොයා ගන්න මට සිද්ධ වෙනවා. හැබැයි මේ මෘදුකාංගය වින් හතට විතරක් නෙමේ. පහත OS වලටත් හරි.

• Windows Vista - 32 bit
• Windows XP - 32 bit
• Windows 7.0 - 32/64 bit
• Windows Server 2003 - 32 bit

අපේ පරිගණක වල නිතරම දෝෂ මතු වනනේ ටෙම්පරි ෆයිල් සෑදීම. හාඩ් එක අනවශ්‍ය ෆයිල් වලින් ගහන වීම. රිජිස්ට්‍රි එරර් වගේ දේවල් නිසා. ඉතිං ඒකට හරියන මෘදුකාංගයක් තමා මේක. එහි නම Comodo System Cleaner . ආරක්ෂිත විදියට කම්පියටරය සුද්ද කරන්න මේ මාදුකාංගයට පුළුවන්. මේ ලින්ක් වලින් මෘදුකාංගය ගන්න පුළුවන්. එක්ස්ෆයර් වෙන පාටකුත් නෑ. වැල් වටාරං ඕන නෑ. අරන් බලන්න. වැඩි විස්තර මෙතැනින් ගන්නකෝ.

http://us4.download.comodo.com/csc/download/setups/CSC_SETUP_2.1.114194.1_xp_vista_server2003_win7_64bit.zip

http://eu1.download.comodo.com/csc/download/setups/CSC_SETUP_2.1.114194.1_xp_vista_server2003_win7_32bit.zip

http://download.cnet.com/3001-20432_4-10909697.html?spi=3e8e2a139f786d18c35e0c83c5fed3b5

වචන ශක්තිමත් නෑ

සත්‍ය ආදරය පැහැදිලි කිරීමට තරම් වචන ශක්තිමත් නැත.

ග්‍රාමීන් මයික්‍රෝ ක්‍රෙඩිට් සමාගමට මහ බැංකු අනුමැතිය.

ලක්ස 3 කට අධික ගණුදෙණුකාර සාමාජිකාවන් පිරිසක් සිටින ග්‍රාමීන් මයික්‍රෝ ක්‍රෙඩිට් සමාගම(කලින් සෙලින්කෝ ග්‍රාමීන් ක්‍රෙඩිට් සමාගම) සතියකට වරක් තම සියළුම සාමාජිකාන් මුහුණට මුහුණ හමුවන ලංකාවේ පිහිටි එකම ණය දෙන මූල්‍ය සමාගමයි. ලංකාවෙන් දුගී දුප්පත් කම මුලිණුපුටා දැමීම තම තේමා පාඨය කරගත් එම සමාගම වර්ෂ 2000 මැයි 08 වැනිදා ආරම්භ කරන ලදී. එහි වත්මන් සභාපතිවරයා වන්නේ, කලින් එම සමාගමේ උප සභාපතිව සිටි ගීතලාල් වික්ටර් රත්නායක මැතිතුමායි. අද උදෑසන මොරටුවේ සර්වෝදය රැස්වීම් ශාළාවේ එම සමාගම විශේෂ රැස්වීමක් පැවැත්වූවා, සියළුම සේවක මහතුන් සඳහා. ඒ විශේෂ පණිවිඩයක් දැනුම් දීම සඳහායි.

එනම් ඊයේ දිනයේ(2010-02-18) සිට ග්‍රාමීන් මයික්‍රෝ ක්‍රෙඩිට් සමාගමට මූල්‍ය සමාගමක් ලෙස, ශ්‍රීලංකා මහ බැංකුවේ අනුමැතිය හිමි වූ පුවතයි. මෙය දැනුම් දෙන විට සේවක මණ්ඩලය නොකඩවා අත්පොළොසන් දෙමින් තම සතුට ප්‍රකාශ කළා. ඡායාරූපයේ දැක්වෙන්නේ එම සමාගමේ වත්මන් සභාපති ගීතලාල් වික්ටර් රත්නායක මැතිතුමායි.

සිංහල බ්ලොග් කරුවනි ඔබට තුති...

මම ‍මගේ බ්ලොග් සයිට් එක පටන් ගත්තේ 2010-02-05 වැනිදා. මට බ්ලොග් එකක් පටන් ගන්න ආස හිතුනෙ සිංහල බ්ලොග් කරුවන්ගේ සයිට් එක දැකීමෙන්. මම මේ ටික දවසට ගොඩක් දෙනෙකුගේ බ්ලොග් කියවල තියෙනවා. නොදන්න දෙවල් ගොඩක් දැන ගන්න ලැබුනා, ඒ හැම ලිපියකින්ම. එවන් වටිනා දැනුම් සම්භාරයක් ලබා දෙමින් විශාල පිරිසක්ව දැනුවත් කරන ඔබ සියළු දෙනාටම මගේ අවංක ස්තූතිය පිරි නමනවා. මට හැම විටකදීම ඒ ලිපි වලට comment දාන්න ලැබෙන්නේ නෑ. ඒකට මට ඇත්තටම සමා වෙන්න. මේ ලිපිය ඔබ සියළු දෙනාටම comment එකක් වශයෙන් මම ලියන්නේ. තමන්ගෙ ලිපියකට ලැබෙන comment එකක තියෙන වටිනාකම මම හොදට දන්නවා. හැමදාම Google Reader එකට අප්ඩේට් වෙන ලිපි කියවනවා. ඒ වගේම සිංහල රීඩර් එකත් බලනවා.

මම දැනුම ලබා ගන්නවා වගේම, මම දන්න ටික දේත් ඔයාලටත් ලබා දෙන්නයි මේ බ්ලොග් එක පටන් ගත්තේ. මම ලියන ලිපි වල ගොඩක් අඩුපාඩුත් ඇති. ඔයාල ඒ වගේ අඩුපාඩු දැක්කොත් මට comment එකක් දාන්න. මම වැරදි හදා ගන්නම්. මගේ සයිට් එකේ තියෙන Flag Counter එක මම add කළේ ඊයේ (2010-02-17) දවල් 2.00 විතර. අද වෙනකොට ගොඩක් අය සයිට් එක බලල තියෙනවා කියල ඒකෙන් පේනවා. ඒකත් මට ලොකු අහිංසක සතුටක්. ඔබ සියළු දනාටම ස්තූතියි.

පූසා වතුර වලේ... අපි දන්නේ නෑ.

මේ වැඩේ සිද්ධ වුනේ මට මතක හැටියට 2002 - 2003 විතර කාලයේදි මට හරියටම මතක නෑ. මට ඉන්නවා යාළුවෙක් පොඩි හාමුදුරු නමක්. මේ කාලයේදි උන් වහන්සේගේ වයස අවුරුදු 14 ක් විතර ඇති. අපි දෙන්න හරිම එකතුයි මොකද මේ කාලෙට කලින් මමත් හිටියේ ඔය පන්සලේ උසස් පෙළ කරන්න නතර වෙලා. දෙන්න එකතු වෙලා ජිල්මාට් වැඩමයි කරන්නේ. හැමදාම ලොකු හාමුදුරුවන්ගෙන් බැනුම් තමා ඉතින්. ලොකු හාමුදුරුවො හරිම හොදයි.

අපි දෙන්න ඒ දවස් වල කොම්පියුටර් ඉගෙන ගන්න මාර ආසයි. ඉතින් කීයක් හරි හොයාගෙන පොත් ගන්නවා. කොම්පියුරයක් නැතත් සොෆ්ට්වෙයා CD එකතු කරනවා. ඔය වැඩ තමයි කරන්නේ. ලොකු හාමුදුරුවෝ අපි දෙන්නට “කොම්පීටර්“ කාරයො දෙන්න කියල කියන්නෙ. පොඩි සාදු මටත් වඩා දක්ෂයි. අද උන්වහන්යේ ලංකාවේ ජනප්‍රිය කෙනෙක්. ලංකාවේ පළමුවෙන් පරිගණක සංගීත නිර්මාණට යොමු වූ ස්වාමීන් වහන්සේ උන් වහන්සේයි. මේ ලිපිය ලියන අද දවසේ උන් වහන්සේ ඉන්නේ ඉන්දියාවේ චෙන්නායි වල. සංගීත වැඩකටම තමයි ගියෙත්. අද රෑ ලංකාවට එයි. සමහර විට ඔබ උන් වහනසේ ගැන අහලත් ඇති.

ඉතින් වෙච්ච වැඩේ මේකයි. එදා පන්සල් වත්තෙ පොල් කඩල. මමයි පොඩි සාදුයි ලොකු හාමුදුරුවොයි තුන්දෙනා පොල් අහුලනවා. පන්සලේ හිටියා ලස්සන සුදු කළු පුසෙක්. ලොකු හාමුදුරුවෝ පූසට මාර ආදරෙයි. පොල් අහුලන කොට පූසත් අපේ පස්සෙන් එනවා. පන්සල් වත්තේ තියෙනවා පතහක්(ලොකු වතුර වලක්). දැන් අපි ඒ හරියේ පොල් අහුලනවා. මම පොඩි සාදුට කිව්වා දාමුද පූසව වතුරට කියල. කියන කොටම පොඩි සාදු පූසව වතුරට දැම්මා. ලොකු හාමුදුරුවන්ට සද්දේ ඇහුනා. පූසා වතුරෙන් අමාරුවෙන් ගොඩට ඇවිල්ල ලොකු හාමුදුරුවන්ගේ ළගින්ම දිව්වා. ලොකු හාමුදුරුවන්ට හොදටම තරහ. අතේ තිබුන පිහිය පොළොවේ ගහල අපි දෙන්නට හොදටම සද්ද පූජාව දුන්න. මොකාද පූසව වතුරට දැම්මෙ කියල ඇහැව්වම අපි දන්නෙ නෑ කියල දෙන්නම කිව්වා. එහෙනම් මමද ඌව වතුරට දැම්මෙ කියල තවත් බැන්න.

එදා රෑ මෙහෙ වරෙව් දෙන්නම කියල ලොකු හාමුදුරුවො කිව්වා. දැන්නම් ටිකක් තරහ බැහැල. දෙන්නම ළගට ගියා. ඉද ගනියව්. ලොකු හාමුදුරුවො ලොකු පුටුවේ අපි දෙන්න බිම. තොපි දෙන්න කරන්නේ මහ අළුකුත්තේරු වැඩනේ. ඒකා මැරුණනම් එහෙම. දැන් පූසට හෙම්බිරිස්සාව හැදෙයිද දන්නේ නෑ. කියල ලොකු හාමුදුරුවො කිව්වා. අපි සමහන් එකක් දෙමු පොඩි සාදු කිව්වා. තොට මං කියන්නේ නෑ. දෙන්නම ගිහින් විහාරේ ලයිට් නිමල වරෙල්ල කියල ලොකු හාමුදුරුවෝ කිව්වා. එතැනින් වැඩේ ෂේප්. අද වෙනකොට ලොකු හාමුදුරුවෝ අපවත් වෙලා වසර දෙකකටත් වැඩියි. උන් වහන්සේ හරිම හොද ස්වාමීන් වහන්සේ කෙනෙක්. උන් වහන්සේට නිවන් සුව ලැබේවා කියල මම ප්‍රාර්ථනා කරනවා.

ඔබ දුම් බොනවාද? එහෙනම් වසර අග රු 73000/-ක බෝනස් එකක්

ඔබ දුම් බොනවාද? එහෙනම් කෙදිනකවත් ඔබට ඔබේ දරුවාව දුම් පානයෙන් මුදවා ගත නොහැකිය. දෙවරක් සිතන්න.

ඔබගේ දරුවා පමණක් නොවේ ඔබේ බිරිද හා අසල් වාසීන් පවා ඔබ නිසා අක්‍රීයව දුම් පානය කරනවා. ඔබ දවා ලන්නේ ඔබව පමණක් නොවේ මුළු රටේම අනාගතයයි. දිනකට සිගරැට් 10ක් බොන අයෙකු ඒ වෙනුවෙන් රු 200/- පමණ වැය කරනවා. එනම් වසරකට 200/- x 365 = 73000/-ක් වැය කරල නේද. ඔබ ඔබේ දරුවාට, බිරිදට අසල් වාසියාට තිළිණ කරන්නේ පිළිකාවක්ද?

වැරදි කා අතිනුත් වෙනවා. (වැරදි නැති කෙනෙක් මෙදියත උපදනේ නැත) කෙනෙක්ට තර්ක කරන්න පුළුවන් සිදුහත් කුමාරය, යශෝධරා දේවිය හා රාහුල පුතුව තනිකර දමා යාමත් වරදක් කියා. නමුත් අපිට වැරදි හදා ගන්න දවසක් එනවා. ඒ දවස අදයි. බුදුන් වහන්සේ පවා යශෝධරාවට සහ රාහුල කුමරුට නිවන් මග පෙන්වා දෙමින් තම වරද නිවැරදි කර ගත්තා. ඔබටත් පුළුවන් අදම තීරණය කරන්න වසර අග රු 73000/- බෝනස් මුදල අපහසුවකින් තොරව ලබා ගැනීම සදහා.

ජීවිතයට වදනක්

ඔබ වෙලාවට වැඩ කරනවාද ? එහෙනම් අද සිට වෙලාවටත් කලින් වැඩ කරන්න.

My Sql සිංහලෙන් (5 වන ලිපිය)

අප දැන් කමාන්ඩ් හැසිරීම දක්වා පැමිණ ඇත්තෙමු. (හතරවන ලිපිය හා සම්බන්ධයි). අද එතැන් සිට....

මොනවද මේ sql කමාන්ඩ්. ඒ කියන්නේ sql ලැන්ග්වේජ් එකේදි භාවිතා කරන, පරිගණයට තේරෙන, ඉංග්‍රීසි භාෂාවෙන් sql වල සම්මුතීන්ට අනුව ලියනු ලබන විශේෂිත වූ වචන ටිකක්. මෙහි එක් කමාන්ඩ් එකක් තමයි select. ඉහතදී කළ අභ්‍යාස වලදී අපි භාවිතා කලේ මේ කමාන්ඩ් එකයි. Select කමාන්ඩ් එක සර්වර් එක මත ක්‍රියාත්මක වී එහි ඇති නිශ්චිත දත්තයක් හෝ දත්ත වැඩි ප්‍රමානයක් යම්කිසි ගණිතමය කාර්යයකට භාජනය කොට එය, සේවාදායකය(client) වෙත ලබා දෙයි. මෙසේ ගණිතමය ක්‍රියාවකට බඳුන් වූ දත්තයන් සේවාදායකය (client) වෙත ලබා දීමට පෙර සර්වර් එක මගින් පේලි(row) සහ තීර (colomn) ලෙස ඇති වගුවක් තුළ රඳවනු ලබයි. mysql>select 25+5; ලෙස කමාන්ඩ් දුන්විට එහි පිළිතුර, වගුවක් ලෙස පෙන්වන්නේ මේ නිසායි.

දත්ත වගුවක් හදමු.

mysql>create database myshop; (එන්ටර් කී එක ඔබන්න)

Ø පොඩි ඔත්තුවක් - ඔබ MySql භාවිතා කරන විට හැම කමාන්ඩ් එකක් අවසානයේදීම සෙමිකෝලන්ඩ් (;) යෙදිය යුතුය. ඒ වෙනුවට \g යොදා බලන්න.

මේ කමාන්ඩ් පෙළ මගින් myshop නමින් ඔබේ පරිගණකයේ වෑම්ප් සර්වර් එක ස්ථාපනය වන විට එමගින් තනා ගත් C:\wamp\bin\mysql\mysql5.1.36\data\ ෆෝල්ඩරය තුළ myshop නමින් නව ෆෝල්ඩරයක් තනයි. mysql වලදී ඩේටාබෙස් සේව් වන්නේ ෆෝල්ඩර් ලෙසටයි. නැවත පහත පරිදි තවත් ඩේටාබෙස් එකක් තනන්න.

mysql>create database sumudu; (එන්ටර් කී එක ඔබන්න)

දැන් C:\wamp\bin\mysql\mysql5.1.36\data\ පාත් එකෙහි sumudu නමින් ෆෝල්ඩරයක් තැනී ඇත. නැවත එම කමාන්ඩ් එකම ලබා දෙන්න. එනම් sumudu නමින්ම තවත් ඩේටාබෙස් එකක් තනන්න උත්සාහ කරන්න. සිදු වන්නේ කුමක්ද?

mysql> create database sumudu;

ERROR 1007 (HY000): Can't create database 'sumudu'; database exists

මෙන්න එරර් එකක්. එම නමින් ඩේටාබෙස් එකක් සර්වර් එකේ තියෙනවලු. ඉතිං ඒක හරිනේ. අපි කලිනුත් එකක් හැදුවනේ. එකම තැන එකම නමින් ෆෝල්ඩර් දෙකක් හදන්න බෑනේ ඒකයි කේස් එක. එහෙනම් නීති විරෝධී වැඩක් කරමු. අවශ්‍යතාවයට නීතියක් තියෙනවයෑ ඉතිං. (පස්සෙනෙ කෙලවෙන්නෙ) C:\wamp\bin\mysql\mysql5.1.36\data\ පාත් එකට යන්න. ගිහින් එතැන තියෙන sumudu ෆෝල්ඩර් එක drop කරන්න. (ඒ කිව්වෙ delete කරන්න කියල). දැන් ආයෙමත් MySql කන්සෝල් එකේ අර කමාන්ඩ් එකම දෙන්න.

mysql> create database sumudu;

Query OK, 1 row affected (0.01 sec)

ඔන්න දැන් ආයෙත් අපූරුවට ඩේටාබෙස් එක හැදුනා.

ü අද මම ඔබට හෝම් වර්ක් එකක් දෙනවා.

බලන්න ආයෙත් ඒ C:\wamp\bin\mysql\mysql5.1.36\data\ පාත් එකේ sumudu ෆෝල්ඩර් එක තුළට යන්න. ඒක ඇතුලෙ මොනවද තියෙන්නේ. db.opt කියල ෆයිල් එකක්. මොනවද ඒක ඇතුලෙ ඇත්තේ. රයිට් ක්ලික් කරල open with -> Notepad දීල ඕපන් කරන්න. හැබැයි නිතරම මේකෙන්ම ඕපන්වෙයන් කියන චෙක් බොක්ස් එක හිස්ව තියන්න. ඒක ඇතුලෙ තියෙන්නේ මේ වගේ අන්ඩර දෙමළයක් නේද? හැබැයි එක පෙළට.

default-character-set=latin1

default-collation=latin1_swedish_ci

මෙහි ඔබට පෙනෙනවා character-set ලෙස වදනක් සහ collation ලෙස වදනක් තිබෙනවා. මොනවද මේවා. ඉහත වදන් පේලි වලින් කියැවෙන දේ කුමක්ද?

මේ ගැන හොයල මට කමෙන්ට් එකක් දාන්න. එහෙම වුනාම හැමෝටම තේරෙන්න මේ වැඩේ කරන්න පුළුවන්. වුවමනාවක් වුනොත් sumuduclass@gmail.com ඊ-මේල් ලිපිනයත් මතක තියා ගන්න. ඉදිරියේ දි ඔයාලගෙ පැවරුම්(Assignment) මේ ලිපිනයට එවන්න. මේවා හැමෝටම වැදගත් නොවුනත් වැදගත් වෙන අයත් ඉන්න පුළුවන්. ඒ ටික දෙනා හරි වැඩේ හරියට කරන්න. අනිවාර්යය නෑ.

ජපන් එස් පහ (5S) ගැන ලිපි පෙළක් ළඟදීම

ඔබේ ජීවිතයේ දියුණුව ක්‍රමවත්ව ලඟා කර ගැනීමට ප්‍රයෝජනවත් වෙන ජපන් එස් පහ ක්‍රමය ගැන ලිපි කීපයක් ලිවීමටයි මගේ අදහස. ගෙදරදී එස් 5 භාවිතා කරන ආකාරය විශේෂ කරගෙනයි ලියන්න හිතාගෙන ඉන්නෙ. මේ ගැන ඔබේ අදහස් මුලින්ම මට ලබා දුන්නොත් ලිපි පෙළ වඩාත් හරවත් වේවි.

ස්තූතියි.